ҰБТ-2018: Тест сұрақтары 50 пайызға жаңарды

2018 жылға арналған Ұлттық бірыңғай тесті сұрақтары 50 пайызға жаңарды. Бұл туралы бүгін Үкімет үйінде өткен баспасөз мәслихатында Ұлттық тестілеу орталығының директоры Рамазан Әлімқұлов айтты.

«Ағымдағы жылы ҰБТ 15-ші рет өтейін деп отыр. Осы уақыт аралығында шамамен 1,5 млн түлек Ұлттық бірыңғай тестілеуге қатысты. Қазіргі уақытта 2018 жылдың ҰБТ-сына дайындық штаттық режімде жүргізіліп жатыр. Барлық аудитория дайын. Өздеріңіз де білетіндей, биыл оның форматы өзгермейді. Үш міндетті пән болады: Қазақстан тарихынан 20, сауатты оқудан 20, математикалық сауаттылықтан 20 және таңдап алынған 2 пәннен 30 сұрақтан»,-  деді ол.

Орталық басшысының айтуынша, бүгінде республикалық апелляциялық комиссияның мүшелері іріктеп алынған. Оған 54 адам кіріп отыр.

«Апелляция тетігі де сақталады, ешқандай өзгеріс жоқ. Яғни, ҰБТ тапсырған түлек келесі күні сағат 13:00-ге дейін дау тудырған сауалға байланысты жергілікті апелляциялық комиссияға өтінім бере алады. Одан кейін егер жергілікті комиссия дауласуға себеп бар деп шешетін болса, онда материалдарды республикалық комиссияға береді», - деді орталық басшысы.

Оның дерегінше, өткен жылы 198 апелляциялық шағым түссе, оның 50 пайызы техникалық мәселелерге қатысты болған. Мазмұнына қатысты 98 мәселе көтеріліп, қанағаттандырылған.

«Өткен жылы ҰБТ-ның тест тапсырмалары 40 мың болса, соның 98 сұрағы, яғни 0,02 пайызы ғана дау тудырды. Әлемдік тәжірибеде 1 пайызға дейін қалыпты болып есептеледі. Біз бұл дұрыс көрсеткіш деп санаймыз. Ағымдағы жылы тест сұрақтарының базасы 50 пайызға жаңарды және биылғы ҰБТ-да 80 мың сұрақ болады», - деді ол.

ҚазАқпарат


Әлеуметтік желілерде бөлісіңіз:


Басқа да жазбалар

Пікірлер (1)

Асылай

ҰБТ оқушының білімін көрсетпейді оның бойында үрей мен үлкен күйзеліс қалыптасады.Осы ҰБТ ны кезінде біз тапсырмай ақ жоғары оқу орнына түсіп мамандық иесі болдық.Мен өзім ұстаз ретінде 11 сынып оқушыларын апарғанда олар тапсырып шыққанша жанымды қоярға жер таппаймын.Өз балам тапсырғанда қатты ойладым.Қатып қалған заң жоқ шетелден алып тəжірибе жасауды қою керек.

Пікір қалдырыңыз

nationalgeographic.kz
Сертификат алу. Сертификат, алғыс хат пен диплом алу жөнінде мәлімет
ҰБТ(онлайн тест)